قصص وروايات

قصة لن أتزوجه متزوجاً بقلم آية علي

_أمل :سيبيه يرن ده المحروس علي عينه حسن ربنا يخليه لأمه بلاغيبة ….

_أماني : ياقلبك ياشيخة حرام عليكي كده تسيبيه يرن وتقلقيه عليكي ولاهو يعني علشان بيحبك تعملي فيه كده ….

_أمل :ههههههه لا وطول النهار على كده مش دلوقتي بس خليه لازم يتربي ويعرف غلطته كويس …

_أماني :حرام عليكي ردي عليه حتي بدل مايقلق عليكي ….

_أمل :لا مش هرد خليه علي نار كده يقلق ولا يتفلق ..

…وفضل الفون يرن لحد ماالجرس خلص ومارنش تاني والعشا كان جهز خلاص …..

…أماني دخلت تصحي منال علشان تتعشا معاهم وطلعوا اتعشوا كلهم مع بعضهم …..

منال :شوفتي ياست أمل طول اليوم وأنا مطحونة في الشغل بسببك وشايلة شغل حضرتك علشان طبعاً كنتي غضبانة ومش عاوزة تروحي والسبب تافه جداً قال يعني أول مرة تتخانقوا مع بعضكم…..

_أماني :لا خودي المصيبة الكبيرة كمان طول النهار يرن عليها يصالحها ودلوقتي كان بيرن برضه وهي البعيدة قلبها حجر وسايباه يفضل يرن ولا في دماغها يعني حتي مش بتتقل شوية عليه وخلاص لا ده تاركاه نهائي ومش عاملاله أي إعتبار مش عارفة ايه ده والله ….

_منال : ياااه لدرجاتي المشكلة مابينهم كبيرة كده ليه خير ياست أمل فيه ايه مخلي حضرتك مش عاوزة تردي علي خطيبك……

_أمل :ليكم حق والله تتريقوا أصلكم مش فاهمين ومش عارفين حاجة واللي مايعرفش يقول عدس……

_أماني :طب عرفينا وفهمينا حضرتك أنتي ياأم العريف والمفهومية كلها ايه ياحبيبتي اللي احنا مش عارفينه ولافاهمينه …..

_أمل :قال ايه البيه سي حسن عاوز يقعد أمه معانا في البيت ليه أنا كنت هتجوزه هو وأمه ولاايه ….

_أماني :طب وايه يعني ياأمل هي أمه هتعملك ايه راضيها وخلاص وعاملي ربنا فيها …..

_منال: يعني هي هتعيش معاكم ولالما تعوز تيجي كام يوم مثلا تقضيهم معاكم تيجي …

_أمل:لا تعيش معانا بس من كرم أخلاقهم هتسيبنا أول شهر مع بعضنا وبعد كده هتيجي تعيش عندنا ..

_أماني :طب وماله ياأمل ماهو مش هيبقي ليها حد وهتبقي لوحدها ومش هيبقي جزائها من ابنها بعد مافنت عمرها عليه لما جوزها مات وحرمت نفسها من الجواز والحياة وهي كانت لسه في عز شبابها وقعدت لابنها وكبرته وربته وهتجوزه يجي هو لما يتجوز يخلي بيها وينساها….

_أمل :وأنا مالي أنا هكون عروسة وعاوزة اتجوز وافرح بشقتي وحالي ونفسي وجوزي واخد راحتي في بيتي كده مش اقعد اخدم أمه وبعدين ماتخليها في بيتها ماهو هيكون جنبنا يعني لازم تلزق فينا …

_منال :مالكيش حق ياأمل كده وأماني بتتكلم صح ..

_أماني :وبعدين لو مش هيكون ليه خير في أمه يبقي مش هيكون ليه خير فيكي قدام ….

_أمل : يووووة بقي أنا زهقئت حرام عليكم كلكم …

…وقامت أمل وسابتهم وغضبت عالأكل وهما بقوا مدايقين ومستغربين لحالها ولأفعالها اللي تزعل ….

_أماني :ربنا يهديكي ياأمل يابنت خالي ويرجعك لعقلك وصوابك ….

_منال :سيبيها براحتها دي صاحبتي وأنا عارفاها كويس ….

…وقامت كل واحدة منهم علي أوضتها ودخلت تنام علشان تقدر تصحي لشغلها وحالها …..

…………………………………………………………….

_في المساء في الأماكن الراقية في التجمع الخامس :

………………………………………………………………

…كان يعيش الأستاذ فاروق في فيلا كبيرة وواسعة ومراته بتجهز العشا وولاده أطفال صغيرين بيذاكروا في أوضتهم …..

….الأستاذ فاروق سهران بيسمع التلفزيون ومستني مراته تجيب العشا ست جميلة وشاطرة في شغل بيتها وحالها وموفرة لجوزها كل سبل ووسائل الراحة وهو بيحبها جدا بس غصب عنه بقي قلبه يساع من الحبايب كتير وحب أماني برضه ونفسه تكون معاه وبين إيديه وطبعاً وقته كله وهي شاغلاه وواخدة منه عقله ومش بيفكر طول الوقت غير فيها …..

….فجأة جت عليه زوجته من ورا ضهره وبهزار وخفة دم حطت إيدها علي عنيه وقالت :

“حبيبي سرحان في ايه اللي واخد عقلك يتهني بيه”

_الأستاذ فاروق لف واخدها في حضنه وهزار وضحك وحب وقاموا اتعشوا وقضوا سهرتهم الجميلة مع بعضهم للصبح والولاد ناموا في أوضتهم.

وطبعاً من عادة الأستاذ فاروق بالليل أثناء سهرته مع زوجته وأولاده يكون قافل فونه علشان مافيش شئ يشغله عنهم سواء شغل أو حد من صحابه أو واحدة من اللي بيحبوه وبيجروا وراه وهو اهو بيريحهم ويتكلم معاهم وخلاص لكن طبعاً في الأول وفي الأخر مافيش عنده أغلي من مراته أم ولاده بس هو غصب عنه أول ماشاف أماني وقع في حبها …….

……………………………………………………………

…بتمر الأيام وكل أبطال قصتنا علي حالهم والدنيا ماشية معاهم زي الفل ….

…أماني ماشية في شغلها وحالها وحياتها تمام بنجاح وتفوق وتطور دائم …..

…أمل بنت خالها في شغلها وحالها وإتصالحت هي وخطيبها حسن وعادي زي ماهما يوم كويسين يوم زعلانين ومختلفين علي أتفه الأسباب وطبعاً أمل هي اللي بتتخانق معاه بسبب وجود مامته معاه واهو متحمل وساكت علشان يتجوز ويستقر وبيقول في نفسه هو ومامته اللي نعرفه أحسن من اللي مانعرفوش ….

….منال في شغلها ماشية تمام وكويسة ومستنية نصيبها وسايبة كل شئ علي ربنا ولابيشغلها الخطوبات ولا الجواز في أي شئ ….

…الأستاذ فاروق مازال بيزيد إعجابه وحبه لأماني كل يوم أكتر من اليوم اللي قبله ودائما مراقبها في كل تحركاتها وعينه مش بتتشال من عليها أبدأ وطبعاً هي ولافي دماغها ولا واخدة بالها أصلا منه كل اللي شاغلها شغلها لكن صحابها اللي معاها في المكان اخدوا بالهم ودائما بيتكلموا ويتريقوا عاللي بيحصل بس من العادة الكلام بيأجي عند صحابه ويقف …..

…………………………………………………………….

_وبعد مرور أسبوع من أحداث قصتنا وأبطالها :

………………………………………………………….

…كانت أماني في مكتبها وفي أخر اليوم وكانوا كلهم خلصوا شغلهم وبيجهزوا حالهم وبينهوا شغلهم ومروحين بعد إنتهاء اليوم المتعب الشاق من ضغط شغل وعمل ……

…أماني كانت بتخلص شغلها وتقفل كل شئ والكمبيوتر بتاعها وقايمة من علي مكتبها علشان تأخد شنطتها وتمشي وكانوا زملائها في المكتب مشيوا قبلها اللي دخلوا يغيروا ويجهزوا حالهم واللي نزلوا يعني هي كانت إتاخرت خمس دقائق علي ماكملت شغل اليوم وقفلته ونهته بالكامل وفجأة إتفاجئت بالأستاذ فاروق جاي عليها وبيتكلم معاها ….

_الأستاذ فاروق :أهلا ازيك ياأماني ايه اتأخرتي كده ليه زملائك كلهم خلصوا وروحوا ….

_أماني :متأسفة والله يا أستاذ فاروق بس كان فاضل شوية حاجات قولت لازم انهيها حاجات بسيطة يعني مش مستاهلة اسيبها وبعدين ده أنا إتاخرت خمس دقائق مش كتير والناس لسه نازلين ماشين بعد إذن حضرتك بقي…..

_الأستاذ فاروق :طب استني تعالي أوصلك بعربيتي لحد بيتك كمان ….

_أماني :متشكرة حضرتك أنا هروح أنا ….

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى