الحلقة الأولى
تجلس على الأريكة تنظر إلى نشرة الأخبار، أثناء احتساءها لقهوتها، على محياها علامات العبوس، وهي تستمع إلى حديث المذيعة المتأثرة بما حدث مساء أمس، بات الأمان في هذا العالم شيئًا من محض الخيال.
_ مأساة بمعنى الكلمة أعزائي المشاهدين، صحينا اليوم على حادثة كبيرة، واللي قلبت السوشيال ميديا كلها ليلة أمس، مش عارفين إزاي العروسة قدرت تعمل كده؟ تتسبب في غياب زوجها بالطريقة الصعبة دي، وبعدها تتسبب في غياب نفسها؟ والتوقيت أغرب بجد، بعد ما راحوا بيتهم يعني من على قاعة الفرح للبيت إيه اللي حصل معاهم خلاها تعمل كده؟ تفاصيل كتير محتاجين نعرفها، ودلوقت معانا والدة ريماس تحكي لنا ليه بنتها عملت كده وإيه اللي حصل بالظبط؟.
انتقلت الكاميرا من على وجه المذيعة موجهة إلى سيدة في منتصف الأربعينات، ملامحها مكلومة وعينيها مغمورتان بالدموع، خرجت كلماتها ضعيفة، أثر مُصابها:
_ بنتي ريماس مكنتش في حالتها الطبيعية، ولا في وعيها دي روحها في إسلام وقد إيه تعبوا لحد ما اتجمعوا…
لم تكمل منعتها غصة حادة وقفت بمنتصف حلقها، لتعض على شفتيها بأسنانها، تُغمض عينيها وهي تمسح عليهما بأطراف أصابعها، لتتدخل المذيعة وتقترب منها وهي تربت على كتفها بحنان، تُناولها كوب الماء وبعد أن ارتشفت منه، هدأت قليلًا ثم بدأت تحكي ما حدث:
_ دايما كانت تقوم تصرخ في الليل من الكوابيس اللي مش رحماها، كانت بتقول إنها بتشوف نفسها، بتأذي إسلام في يوم الفرح وتفضل تصرخ وعياط بدون توقف، قولنا يمكن محسودة ولا حاجة أو توتر الفرح وكدا، بدأنا نشغل قرآن فترة وارتاحت شوية، والكوابيس هديت وبدأت حياتها تمشي بشكل طبيعي، كانت مبسوطة وطايرة من الفرحة أما قرب ميعاد الفرح وبتحضر كل حاجة هي وبنات عمامها وخالاتها، والدنيا كانت حلوة لحد ليلة الحنة رجعنا للهم تاني دخلت عليها أنا وبنات عمها…
نظرت لها وهي تضرب على جبهتها تقول بضيق:
_ يادي التوهة اللي أنا فيها، ادخلي يا سماح شوفي ريماس أختك كانت قايلالي على إيه؟ علشان ابعت اجيبه.
ابتسمت في وجوه الفتيات أقارب زوجها وأقاربها:
_ وآه خليكم معاها يا بنات.
أومأت سماح بالإيجاب وهي تبتسم بسمة صغيرة مشيرة إلى بنات عمها بالقدوم معها، وما إن وطأت أقدامهم الغرفة ألجمت الصدمة ألسنتهم، وهم يرون المشهد التالي…
كانت ريماس تمسك بيدها أداة حادة، وتعمل في فستانها بطريقة غير متزنة ورغم إصابة يديها إلا أنها لم تتوقف، تُهمهم بكلمات غير مفهومة، هرعوا صوبها سريعًا يحاولون منعها من إيذاء نفسها، وتحدثت سماح قائلة:
_ ريماس بتعملي إيه؟ هاتي الأداة دي؟.
نظرت لها ريماس بعيون غاضبة وهي تقول:
_ ابعدوا عني، مش بحبه، مش عوزاه ابعدوا عني مش هتجوز.
صُعقن من حديثها، تزامن ذلك مع دخول والدتها للغرفة لما تأخرت سماح عليها، لتركض ناحيتها وهي تصرخ بصدمة:
_ أنتِ اتجننت يا ريماس هتسيبي إسلام؟ ده أنتِ فرحك بكرا يا بنتي، عايزة تفضحينا.
نهضت ريماس تنظر لهم بغضب وهي تضع الأداة بمحاذاة عنقها تصرخ بدموع:
_ قولت مش عايزاه، ابعدوا عني أنا بكرهه.
نظرت والدتها لها بتشوش وصدمة لتقع على الأرض فاقدة للوعي، ليزداد صراخ الفتيات قريباتها، التف الجميع حول والدتها، وفجأة اقتحم الغرفة آيات تُتلى بصوت عذب للشيخ عبد الباسط عبد الصمد.
وَإِذَا لَقُوا الَّذِينَ آمَنُوا قَالُوا آمَنَّا وَإِذَا خَلَوْا إِلَىٰ شَيَاطِينِهِمْ قَالُوا إِنَّا مَعَكُمْ إِنَّمَا نَحْنُ مُسْتَهْزِئُونَ
نظر الجميع لمصدر الصوت كان عمها الأكبر يحمل هاتفه وأصوات عبد الباسط صاعدة منه.
اللَّهُ يَسْتَهْزِئُ بِهِمْ وَيَمُدُّهُمْ فِي طُغْيَانِهِمْ يَعْمَهُونَ
كانت ريماس تنظر صوبه وهي تتنفس بصوت مرتفع، ويدها لا زالت عند رقبتها أين تضع الأداة.
أُولَـٰئِكَ الَّذِينَ اشْتَرَوُا الضَّلَالَةَ بِالْهُدَىٰ فَمَا رَبِحَتْ تِجَارَتُهُمْ وَمَا كَانُوا مُهْتَدِينَ.
اقتربت منها سماح محاولة أخذ الأداة منها، حدقتها بعينين يملأهما الغضب وهي تبتعد عنها.
مَثَلُهُمْ كَمَثَلِ الَّذِي اسْتَوْقَدَ نَارًا فَلَمَّا أَضَاءَتْ مَا حَوْلَهُ ذَهَبَ اللَّهُ بِنُورِهِمْ وَتَرَكَهُمْ فِي ظُلُمَاتٍ لَا يُبْصِرُونَ
ازداد صراخ ريماس بقوة، وهي ترى عمها يشير لهم بإخلاء الغرفة وتركهم بمفردهم، وهو يتقدم منها حتى أضحى على بُعد إنش واحد منها، نفذ الجميع وخرجوا بعد أن استفاقت والدتها، وما إن رأت عمها بالغرفة ارتاحت قليلًا.
صُمٌّ بُكْمٌ عُمْيٌ فَهُمْ لَا يَرْجِعُونَ أَوْ كَصَيِّبٍ مِنَ السَّمَاءِ فِيهِ ظُلُمَاتٌ وَرَعْدٌ وَبَرْقٌ يَجْعَلُونَ أَصَابِعَهُمْ فِي آذَانِهِمْ مِنَ الصَّوَاعِقِ حَذَرَ الْمَوْتِ ۚ وَاللَّهُ مُحِيطٌ بِالْكَافِرِينَ
تراجعت ريماس للخلف ملتصقة بالخزانة وهي تبكي وتصرخ بقوة، تضع أيديها على أذنيها بعد أن أفلتت الأداة لتوقعها على الأرض، تنظر للهاتف الذي يصدح بقوة بالقرآن، ثم جثت على الأرض هبط عمها لمستواها وضمها إلى صدره بقوة، بينما هي جسدها ينتفض بقوة، تشبثت بملابسه وهي تصرخ موجوعة.
كفكفت دموعها تنظر إلى المذيعة مكملة بنبرة مقهورة:
_ أجلنا الفرح شهر كمان، علشان نشوف صرفة للي بيحصل للبنت، عمها والشيخ اللي شافها قال إنها ممسوسة وأمرنا نشغل القرآن باستمرار ليل ونهار مينقطعش من البيت، وفعلا عملنا كدا وإسلام كان واقف معاها أيد بإيد الله يرحمه ويسكنه فسيح جناته ويصبر أمه ويصبرنا كلنا، وفعلا ريماس اتحسنت ومبقتش تفكر تأذي نفسها أو تسيب إسلام، وبرغم من تحذير الشيخ لينا إننا منقطعش القرآن من البيت، بس لما قرب ميعاد الفرح أنتِ عارفه بقى جو الافراح المصرية عامل إزاي؟.
ابتلعت لعابها تكمل بغصة:
_ قفلنا على القرآن والأغاني اشتغلت وبرغم رفضي بس لما شوفت بنتي أخيرًا بقت مبسوطة ومفيش حاجة، قولت خلاص يا سوسن بنتك بقت كويسة أهي ومفيش حاجة، وبعد الفرح ما خلص جالي الخبر وأنا لسه يدوب برتاح بعد ما ودعتها، مكنتش أعرف أنها آخر مرة هشوف بنتي، آه يا ريتني كنت أعرف إن ده اللي هيحصل… مكنتش وقفت القرآن أبدًا وكنت فضلت مع بنتي لحد ما اتعافت تمامًا…
انكبت في البكاء بصوت مرتفع، تولول بعينين لامعتين من الدموع وهي تنظر صوب الكاميرات:
_ مش قادرة… منهم لله اللي عملوا في بنتي كدا، ربنا ينتقم منك على اللي عملتيه فيها، يُمهل ولا يُهمل وهتشوفي يوم، مش عارفة ليه الأذية؟ ليه تعملوا في الناس كدا؟ دي دنيا فانية ليه تخسروا آخرتكم علشان شوية مرض في قلوبكم وعقولكم؟ ليه بجد؟ ليه؟ منكم لله!.
_ إن شاء الله حق بنتك مش هيروح، دي شهيدة عند الله هي وزوجها ربنا يصبر قلوبكم، وربنا سبحانه بيقول متوعد ليهم بسم الله الرحمن الرحيم ﴿وَالَّذِينَ يُؤْذُونَ الْمُؤْمِنِينَ وَالْمُؤْمِنَاتِ بِغَيْرِ مَا اكْتَسَبُوا فَقَدِ احْتَمَلُوا بُهْتَانًا وَإِثْمًا مُبِينًا﴾.
ختمت المذيعة حديثها، أطلقت نفسًا عميقًا تقول ببسمة صغيرة:
