قصص وروايات

قصة الأفعى بقلم نورهان ناصر

_ ودلوقت معانا أم إسلام واللي أنا بجد اخدتها مثال وقدوة للأم المصرية الأصيلة واقفة مع والدة اللي تسببت في غياب ابنها في يوم فرحه، حاجة مبتحصلش كل يوم، اتفضلي احكي لينا إيه اللي حصل بالظبط؟.

ظهرت السيدة والدة إسلام تقول ببكاء:

_ بصي يا بنتي أم ريماس مُصابها زي مُصابي، زي ما أنا خسرت ابني هي خسرت بنتها نتيجة ناس مريضة مورهاش غير الأذية.

تنهدت بحزن مردفة:

_ احنا يدوب كنا ارتحنا ولسه بنقعد سمعنا صوت الصريخ والتكسير، قومنا كلنا نجري على فوق، باب الشقة كان مقفول، بقيت أصوت واضرب على الباب، وانده يا إسلام يا ريماس مفيش فايدة…

طرقات عنيفة على باب الشقة وأصوات صراخهم الحادة تتصاعد من داخلها، نظرت إلى ولدها الآخر تقول ببكاء:

_ اكسر الباب يا حمزة بسرعة.

نفذ حمزة وهو يشير لهم بالرجوع قليلًا إلى الوراء، ظل يدفع في الباب بكتفيه حتى فُتح أخيرًا، وهنا كانت الصدمة؛ فغر الجميع أفواههم بقوة، وجحظت أعينهم من المشهد الذي يرونه، تجمدت أجسادهم في موضعها؛ حيث كانت ريماس لا تزال بفستان زفافها الذي تغير لونه بشدة وفي يدها أداة حادة، قد أبعدتها عن زوجها من جانب عنقه تحديدًا، لتتطاير الآثار بغزارة مغرقة وجهها وثوبها الأبيض، نظرت لهم بملامح خاوية، وبلا أي ترددٍ كانت تعدل وضع الأداة، ثم أتمت فعلها في أقل من ثانية دون أن ترمش، لتسقط على الأرض بجانب جسد زوجها الهامدة.

تحدثت المذيعة بنبرة متأثرة:

_ ربنا يرحمهم ويصبر قلوبكم، أفهم من كلامكم إن ريماس مش بس كانت ممسوسة كان في أعمال غريبة في الموضوع زي ما سمعنا ورغم عدم اقتناع البوليس باللي قولتوا بس أنا مصدقاكم.

اجابتها والدة ريماس السيدة سوسن:

_ أيوه يا بنتي، طلعنا العمل من قلب فستان فرحها مكتوب عليه قتل، أنتِ متخيلة وصلت بيهم لفين حسبي الله ونعم الوكيل.

تحدثت المذيعة بدهشة:

_ فستان الفرح؟؟ يبقى عرفتوا مين عمل فيها كدا؟؟؟.

ردت والدة إسلام بوجع:

_ لا للأسف البوليس معرفش يوصل لحاجة والمكان اللي اشترينا منه الفستان مكان معروف ولا يمكن يعملوا كدا، اللي حط العمل ده قريب مننا أوي ده التفسير الوحيد، احنا شوفنا الخياطة اللي ظبطت الفستان على مقاس ريماس والبوليس اخدها يحقق معاها، بس اخلوا سبيلها لعدم كفاية الأدلة، ولا يمكن تعمل كدا أصلا، خصوصا إنها هتكون أول حد نشك فيه، كمان هي متعرفناش معندهاش سبب تعمل كدا فيهم.

أكدت حديثها والدة ريماس:

_ فعلا أنا بردو قولت كدا، والله اللي يتهز له سبع سموات ما أنا رحماها أو رحماه اللي عمل في بنتي كدا، وليكم يوم تجتمع فيه المظالم، وحسبي الله ونعم الوكيل فيكم، املوا كتبكم بشركم وحقدكم، بس ربنا موجود وهيجيب لي حقي منكم، في الدنيا والآخرة.

أطفأت الجهاز وهي تمسح دمعاتها، تزامن ذلك مع قرع جرس الشقة، نهضت بتكاسل تفتح الباب لتقع عينيها على ابنة عمها وأخت ريماس بذات الوقت، وقبل أن تنطق الأخرى بحرف، باغتتها وهي تحتضنها متحدثة بحنان:

_ قلبي عندك يا سماح، ربنا ينتقم من اللي كان السبب.

بكت سماح بقوة، وهي تغمغم بصوت مرتفع أثر شهقاتها:

_ هموت يا سمر، مش قادرة أصدق إن مبقاش فيه ريماس خلاص… كانت لسه في حضني امبارح كنت معاها، كانت معايا أختي راحت من بين إيديا، في كل مراحل حياتها أنا اللي ربيتها أختي دي، لا مش أختي دي بنتي، أنا اللي كنت بهتم بيها واسرحلها شعرها واحكيلها حكايات، مش عارفة أتخيل إنها خلاص سابتني، ده أنا موضوع جوزاها كنت مش متقبلاه لأنها هتبعد عني، هتوحشني خناقتنا سوا وضحكنا مع بعض.

غص حلقها وهي تكمل بعينين موجوعة:

_ ده أنا كنت بيت أسرارها يا سمر، لما حبّت إسلام كنت أول واحدة أعرف ونصحتها تتصرف إزاي؟ وامبارح بس كنت شايفاها طايرة من السعادة، ليه تعمل كدا؟ ليه تأذيه وتأذي نفسها ليه يا سمر؟.

اصطحبتها سمر إلى الداخل، حيث غرفتها تقول بمواساة:

_ غصب عنها بقى يا سماح، ادعي ليها بس.

انتفضت سماح بالبكاء تقول:

_ آه لو اعتر فيها الحقيرة اللي عملت في أختي كدا.

ضيقت سمر عينيها باستغراب:

_ وأنتِ عرفتي منين إنها واحدة؟

طالعتها سماح بضيق مردفة:

_ أكيد واحدة ست، باينة للأعمى، واحدة في قلبها حقد على أختي وبتحسدها.

بعد مرور بضعة أيام، كانت تسير في الشوارع بلا وجهة معينة، فجأة شعرت بأحدهم يقف خلفها تمامًا، وصوت كأنه خرج من الظلام يهمس لها بضع كلمات، ارتجف جسدها وأومات برأسها وبعد ذهابه، زفرت الهواء بقوة وهي تبحث عن ضحيتها الجديدة، وقعت عينيها على شاب وفتاة يبدوان سعيدين للغاية يشبكان أيديهما متجهين صوب ذلك المطعم المعروف على النيل، وللأسف وقعا مع شخص بينه وبين السعادة عداوة أزلية، احتدمت نظرات عينيها، وشعرت بالغضب يملأ صدرها الأسود.

أخذت تراقبهما بصمت تتهيأ الفرصة المواتية لتنفيذ ضربتها، اتسعت ابتسامتها الخبيثة وهي ترى النادل يحضر لهما الطعام، أخذت تهمس بضع كلمات وأعينها مصوبة على النادل الذي وضع الطعام أمامهم، وفجأة صرخت الفتاة بأعلى صوتها، حينما رفع مخطوبها طبق الشوربة وصبه على وجهها لتتأثر بشرتها بشدة، وهنا فقط شعرت بالرضا داخل قلبها المريض، بدأت الأصوات تزداد من خلفها والصراخ وبكاء الفتاة بكل قوتها، قبل ثنيات بسيطة كانت تضحك بقوة والسعادة تُزين عينيها، تناهى على مسامعها حديث مخطوبها الذي استفاق من غيبوبته ينظر إلى بشرتها الحمراء الملتهبة والجلد المتساقط أسفل عينيها إضافة إلى عينيها التي انطفأت الحياة فيهما، بكى بصوت مرتفع وهو ينظر لها:

_ إيمان… إيمان ردي عليا.

والناس من حوله يرددون:

“لا حول ولا قوة إلا بالله”

“يخربيت الهباب اللي بتشربوه”

“شوه البنت، استغفر الله العظيم، حد يطلب الإسعاف”

“يا حرام طب حد يتصل بالبوليس بسرعة، لازم يتعاقب”

همست هي وهي تعبر من أمامهم بانتشاء:

_ تستاهلوا، بتغيظوني يعني إنكم سعداء.

أكملت طريقها وابتسامة على محياها، حتى وصلت بها قدميها إلى مكان مظلم حيث السكون التام، ورائحة الجثث تفوح بكل زاوية، توقفت فجأة ترى مجموعة من الفتيان اليافعين يدفع أحدهم بعض المال إلى حارس المكان، من هيئتهم علمت إلى ما ينتمون، ابتسمت بتسلية وهي تتوارى في الظلام، فتح الحارس لهم أحد الأماكن، فبدأوا بالنزول واحدًا تلو الآخر.

وهنا بأسفل المكان:

كانوا يقفون حول جثمان لفتاة صغيرة لا يتخطى عمرها السادسة عشرة تم دفنها عصر هذا اليوم، تمتم أحدهم فجأة بتراجع:

_ لا أنا همشي، مش هشارك معاكم، أنا إيه اللي جابني؟.

رمقه أحد زملائه بنظرة متهكمة ساخرة:

_ بطل جبن ياض وانشف كدا، بعدين أنت جيت وخلاص، مفيش تراجع.

نظر له بحنق يردد قبل أن يستدير خارجًا:

_ يا سيدي أنا جبان، بعدين حرام عليكم أنا ليا أخت صغيرة، أنتم بجد هاتبقوا دكاترة حرام عليكم، اللي عايزين تعملوه ده.

قهقه رفيقه بسخرية:

_ طيب اخلع أنت يا أبو قلب رهيف، وبكرا لما نكون إحنا أفضل منك وناخد التمام على شغلنا، ابقى سلملي على ضميرك وأخلاقك ابقى خليهم يوكلوك بقى، يالا أنت وهو ساعدوني هات الكشاف ده هنا وطلع الأدوات.

أومأ رفاقه وبدأوا في استباحة جسد الفتاة الصغيرة بلا ضمير، وخارجًا كان يقف هو بعيون باكية لا يصدق ما كان ينوي التورط فيه، استغفر ربه وعزم على تلقينهم درسًا سيذهب ويهددهم بالمغادرة وإلا أبلغ عنهم، حرك رأسه باستحسان لهذه الفكرة، ثم اتجه عائدًا إليهم، احتلت الصدمة معالم وجهه، وهو يرى المكان فارغًا، أين اختفوا؟ أيعقل أنهم تراجعوا؟

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى