قصص وروايات

قصة الأفعى بقلم نورهان ناصر

_ آه طبعا، يالا بسرعة روحي غيري قبل ما يدخل، فال وحش لو شافك قبل الفرح بالفستان.

أومأت روان بصمت، ثم غيرت ملابسها وفي تلك الأثناء دلف خطيبها آدم، الذي نال إعجاب سمر ليزداد الحقد الدفين في داخلها، فلماذا كل هؤلاء سعداء ويحبون بعضهم وهي الجميع ينفر منها؟.

اقتربت منه ثم ادعت أنها ستقع ليسارع هو بإمساكها وأثناء ذلك انتهزت الفرصة ونفثت في وجهه بشيء جعله يحدق بها بعيون متسعة، قبل أن يعود لوعيه يعتدل واقفًا، لتردف هي ببسمة صغيرة وهي تربت على بدلته:

_ آسفة ما اخدتش بالي.

_ ولا يهمك، هي روان لسه جوه.

كانت تقف أمام المول الكبير تنتظر خروج ابنة عمها، حينما وقعت عينيها على المشهد التالي، عندما دفع ذلك الشاب الفتاة يطرحها أرضًا بعد أن صفعها بقسوة، وهو ينزع عن يده خاتمه، يلقيه في وجهها، وهو يشتمها بأفظع الشتائم، التف لفيف من الناس حولهم يحاولون إبعاده عنها، وهم يعنفونه، بينما كانت روان مجهشة في البكاء بقوة لا تستوعب ما حدث توا، فقد كانا يضحكان وسعيدين للغاية، وفجأة تحول وقام بصفعها ليُرديها أرضًا بلا شفقة، كادت تهرع صوبها سماح لكن الصدمة ألجمتها وهي ترى سمر تقف تكتم ضحكتها بصعوبة، بينما الشاب لا زال يسب ويشتم في الفتاة بل ويحاول التهجم عليها، مشهد يدعوك للغضب والحزن على الفتاة المسكينة، ولكن الضحك؟؟.

وهنا رن في عقلها جملة رؤى لها، أنها ليست طبيعية، نظرت لها فرأتها تعود مرة أخرى إلى عملها.

مساءً…

أعددت سماح كل شيء وأنبأت العائلة بأنها ممسوسة، فتصرفاتها غير طبيعية، وقصت عليهم ما حدث معها وما روته لها رؤى.

_ بصوا يا جماعة أنا لحد دلوقت مش عارفة مين بالظبط اللي بيعمل كدا، ومش عايزة أسيء الظن في حد، إنها سمر لأن وارد تكون ضحية فاحنا هنعرف الحقيقة الليلة كلكم هتخرجوا برا البيت، وأنا هفضل مستنياها هنا، و…

قاطعتها والدتها سوسن وهي تقول بغضب:

_ لا واللي بتعمليه ده مش صح…

نظرت لها سماح بضيق:

_ في إيه يا أمي هو حد قالك هنأذيها احنا كدا كدا كنا هنعمل الرقية الشرعية والشافية يمكن الكابوس اللي في بيتنا ده يروح، وبعدين جايز كدا نقدر نساعد سمر، الخاتم اللي في أيدها غريب، صورته من غير ما تاخد بالها، وبحثت عنه.. في كلام كتير طلع لي من ضمنها إنه حاجة ليها علاقة بالأعمال الغريبة، زي ما يكون الخاتم ده فيه قوة مسيطرة على سمر أو فيها شر…

قاطعها عمها محروس والد سمر:

_ لا سمر هي الشر بعينه، مش الخاتم.

تنهدت سماح بقوة:

_ أيًا كان يا عمي، لازم نتصرف لأنها بتأذي ناس كتيرة، أنا بعد تفكير كبير، ربط كل حاجة حصلت في السنوات الأخيرة، وشغلها في تزيين شقق العرسان، وتيقنت إن سمر هي الخيط المشترك، كمان متنسوش أخويا مروان واللي حصله هو وأسماء مراته، سقف الازاز بتاع القاعة يقع عليها يقطعهم وهو مفهوش أي عطل خالص، وقتها قولتوا قضاء وقدر بس دي كانت مدبرة مروان غدر بيها أيوه وهي عندها الدوافع تعمل كدا فيه فكروا شوية.

أردفت حليمة التي عادت بعد ما هاتفها زوجها:

_ بس إزاي هي كانت هنا قدام عينينا؟ كلكم روحتوا الفرح وهي كانت في البيت أنا شوفتها وكمان كانت قاعدة معايا، عارفين وقتها كانت رجلي مكسورة ومقدرتش أروح.

_ مش عارفة يا مرات عمي، المهم إننا نساعدها وخلاص، أتمنى بجد تطلع ضحية لأن لو طلعت هي اللي عاملة البلاوي دي كلها، محدش هيقتلها غيري مع احترامي ليك يا عمي.

وبعد مرور بعض الوقت…

ها قد أتت تلك الشيطانة، جالت بعينيها في أرجاء المنزل، مستغربة من هذا الصمت الغريب، أين رحلوا؟.

تقدمت بضع خطوات وقبل أن تنبس بحرف، ظهرت لها سماح تقول ببسمة صغيرة:

_ أهلا يا سمر، كويس إنك جيتي، أهلنا مش هنا وأنا وأنتِ بس اللي في البيت، احم أنا عايزة أقولك حاجة كدا.

ضمت سمر ما بين حاجبيها بانزعاج وهي ترى ابتسامتها، تقول بغضب مبطن:

_ حاجة إيه؟.

جلست سماح على الأريكة تقول ببسمة واسعة:

_ جايلي عريس لقطة، مش بس لقطة ده طلع كمان بيحبني وهعيش معاه في تركيا البلد اللي طول عمري نفسها اروحها واعيش فيها، بس خايفة أهلي ما يوفقوش عليه، لأني هروح بلد تانية وكدا أنتِ عارفة أمي مبقاش ليها غيري، ريماس راحت وقبلها مروان أخويا.

وضعت سمر يدها خلف ظهرها وهي تتحسس خاتمها، تكبت غيظها وقهرها، وهي ترسم ابتسامة عريضة على ثغرها، فهي على وشك إنهاء تلك السعادة والآن أصبحت لا تكترث إن علموا حتى حقيقتها، مع قوتها الكبيرة، والظلال الذين صاروا تحت إمرتها بأمر من شيطان الظلام نفسه، لم تعد تخشى شيئًا.

لذا وسعت ابتسامتها وهي تتقدم نحوها، وبهمس أخذت تتمتم بكلماتها، وهي ترى زاحف كبير يلتف حول جسد سماح، التي شهقت بقوة، وهي ترى رأس ذلك الزاحف وحجمها، أردفت سمر وهي تقول بسخرية:

_ باي باي يا بنت عمي ابقي سلمي لي على بوراك أمانة لو شوفتيه.

بثبات غريب أردفت سماح:

_ كنت عارفة إن أنتِ اللي بتعملي كدا من الأول، بس قولت بلاش أسيء الظن…

قهقهت سمر بملء فمها، وهي تقول ببسمة:

_ يا حرام يا بنت عمي قد إيه أنتِ طيبة وبريئة وكيوت أوي في نفسك، بس خلاص كل ده هيروح، مفيش حد هايبقى سعيد على وش الأرض طول ما في نفس في صدري…

تبدلت نبرة صوتها لصوت ذكوري كأنه خرج من قعر الظلام:

_ سلبتم السعادة مني، وباتت التعاسة نمط حياتي، وسأجبر العالم كله على مشاركتي الميتم الذي حبستموني بداخله، ستبكون بدلا عني، سأحيل حياتكم لجحيم.

سقطت دموع سماح وهي تشعر بالزاحف يضغط على جسدها:

_ أنتِ مريضة بجد وأنا بشفق عليكِ.

_ وفري شفقتك لنفسك.

همست سماح بألم:

_ أخويا كان ليه حق يسيبك، بس عارفة مين كان السبب مش أمي زي ما فكرتي، لا ده والدك اللي خلاه يبعد، ومرضيش يقولنا أسباب بس اهو عرفنا السبب لأنك شر يا سمر أنت شيطانة (….) مبتحبيش الخير لحد وحقودة، كلنا حاولنا نحبك ونغير منك بس مفيش فايدة، ربنا بيقول ﴿لَهُ مُعَقِّبَاتٌ مِنْ بَيْنِ يَدَيْهِ وَمِنْ خَلْفِهِ يَحْفَظُونَهُ مِنْ أَمْرِ اللَّهِ ۗ إِنَّ اللَّهَ لَا يُغَيِّرُ مَا بِقَوْمٍ حَتَّىٰ يُغَيِّرُوا مَا بِأَنْفُسِهِمْ ۗ وَإِذَا أَرَادَ اللَّهُ بِقَوْمٍ سُوءًا فَلَا مَرَدَّ لَهُ ۚ وَمَا لَهُمْ مِنْ دُونِهِ مِنْ وَالٍ﴾.

تابع المقال

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى