
بعد مرور سنتين.
كانت تقف بجوارها تربت على كتفها، بينما الأخرى جالسة على حافة المكان تولول وتبكي، زفرت هي أنفاسها في حزن، ثم أردفت:
_ خلاص يا مرات عمي، أهلكتِ نفسك.
رفعت زوجة عمها عينيها لها تُردف بدموع شديدة:
_ نفسي أعرف مين اللي عمل فيها كدا يا سمر؟ ليه بنتي؟ عملت إيه؟ علشان يبقى فيه حد بيحقد عليها للدرجة دي؟.
تنهدت سمر تقول:
_ ناس مريضة بقى يا مرات عمي، قُومي معايا يالا.
همست هي فجأة وهي تقبض على يدها:
_ أنا آسفة يا سمر على كل اللي عملته فيك زمان، أنا كنت قاسية أوي معاكِ، وأنتِ طلعتي أحسن مننا كلنا، سامحيني يمكن ده عقاب ربنا ليا على اذيتي ليكِ في يوم من الأيام.
ابتسمت سمر في وجهها بلطف تقول:
_ الماضي أنا رميته ورى ضهري، وأنا مش زعلانة منك، هو مات بقى وراح لحاله.
زفرت أنفاسها براحة ثم ضمتها إلى صدرها، وسمر تربت على ظهرها، ثم همست بخفوت:
_ مرات عمي، ورايا شغل شقة عروسة جديدة هروح افرشها ليها، عارفة كان نفسي أشتغل مصممة ديكور وكدا، بس يالا نصيب بقى ومكملتش تعليم.
_ روحي يا بنتي، أنا السبب سامحيني يا ريت أقدر أعوضك.
منحتها سمر بسمة صغيرة وهي تقول:
_ أنا أهو شغالة حاجة تبع المجال بردو، متزعليش نفسك، وبكرا يبقوا يجروا ورايا علشان اعملهم الفلل بتاعتهم.
بعد مرور بعض الوقت…
كانوا في منزلهم، أوصلتها سمر حتى غرفتها، ثم تركتها ورحلت لتباشر عملها الذي تحب.
وصلت بعد مدة إلى العنوان المنشود، كانت أصوات الزغاريد والضحكات منتشرة، ابتلعت الغصة التي تشكلت في حلقها، وهي ترى مشهد مشابه من الماضي الذي دفنته خلف ظهرها، لترسم بسمة صغيرة على ثغرها، ثم أشارت لها إحدى الفتيات على الشقة تقول:
_ هي دي يا حبيبتي، لو عوزتي أي حاجة ناديني.
_ تسلمي يا قمر، ممكن تفضلي لو عايزة.
ابتسمت الفتاة بعدم تصديق تقول:
_ بجد؟.
أومأت سمر برأسها، ثم أمسكت بيدها ودلفا إلى داخل الشقة، بدأوا العمل حتى انتهوا من نصف المهمة، ارتمت سمر على الفراش الخاص بالعروسين تقول ببسمة مرحة:
_ الشقة بقت تجنن مش كدا؟
هزت الفتاة رأسها بتأكيد، وهي تقول أثناء جولانها بعينيها في أنحاء الغرفة:
_ فعلا تسلم إيدك شغلك حلو أوي.
_ يتهنوا بيها.
بعد مرور يومين.
كان جميع أفراد الأسرة مجتمعين وفجأة انتفضوا على أصوات طرقات عنيفة على باب المنزل، نهضت سمر لتفتح الباب تقول بنبرة هادئة:
_ في إيه يا حضرة الظابط؟
تحدث الضابط بنبرة قوية:
_ بيت عبد القوي حفيظ؟.
أكدت سمر تزامنًا مع سماعها لصوت أبناء عمومتها، يسألونها عن هوية الطارق، أكمل الضابط:
_ فين سمر عبد الرازق؟.
قالت سمر بتوتر:
_ أنا سمر يا باشا هو في إيه؟؟.
_ مطلوب القبض عليكِ، هاتوها.
صرخ أولاد عمومتها حينما حاول أحد الضباط سحبها، لتجتمع العائلة على أصواتهم، وسمر تبكي بشدة مردفة بأنها لم تفعل شيئًا.
في قسم الشرطة مديرية أمن الجيزة.
كانت تجلس سمر أمام الضابط الذي أخذ يلقي عليها الاتهامات وهو يخرج تميمة سوداء مكتوب عليها أشكال غريبة:
_ اعترفي أنتِ اللي حطيتيه في الشقة واتسببتي في غياب العريس وعروسته؟؟.
نظرت له سمر بدموع شديدة:
_ مش أنا يا باشا، أنا معملتش حاجة ولا أفهم في الأعمال الغريبة، أنا رصيت الشقة وكان معايا بنت عمها شهد هاتوها تشهد أنا بريئة، وبعدين مليش عداوة معها هأذيها ليه؟.
وفي الغرفة المجاورة.
كانت شهد جالسة أمام الضابط تبكي بانفطار وهي تقول:
_ احنا رصينا الشقة وطلعنا على طول مش عارفة الأشكال دي كلها جات منين؟.
نظر لها الضابط بصمت ثم قال:
_ يعني مش ممكن تكون سمر هي اللي حطته؟ محدش غيركم كان موجود في الشقة وفضلت مقفولة، لحد ما جه العروسين، فتفسري بأيه وجود الأشكال مع الحجاب ده؟.
أعقب حديثه وهو يخرج صورة وضعها أمامها، نظرت له وأردفت بدموع:
_ معرفش مقدرش اتهم حد، هي كانت قدام عيوني، حرام رصينا الشقة سوا وخرجنا على طول.
وبعد شهادة شهد تم إخلاء سبيل سمر، لعدم وجود دليل ملموس، وفي منزلهم عنفها والدها بشدة وهو يضربها بقسوة شديدة:
_ آخر مرة رجلك هتخطي برا عتبة الباب ده، ومفيش شغل من انهارده، أنتِ إيه شر مفيش مكان تروحيه إلا لما يحصل كوارث؟ من كام شهر بردو الشقة اللي فرشتيها ولعت باللي فيها ولقوا العريس والعروسة متأثرين، وغيرها وغيرها أنا مش عارف إيه الابتلاء اللي ابتليته بيكِ؟ هونها يارب، وخدها خلي البشرية ترتاح، أنتِ بومة نكد مش مستغرب إن مروان سابك أهو ريح نفسه من النحس اللي كان هيصيبه لو كان اتجوزك.
كانت سمر مثل الجثة بين يديه، تنظر له بعيون جامدة، وهو يضربها بقسوة والجميع يحاول إبعاده عنها، حتى تمكنت زوجة عمها من إخراجها من بين يديه بأعجوبة، لتشير صوب ابنتها سماح بأخذها إلى غرفتها، ونفذت سماح على الفور، وما إن استقروا في الغرفة تحدثت سمر بعينين باردتين:
_ سيبني لوحدي يا سماح عايزة أقعد مع نفسي شوية.
أومأت سماح فهي على دراية كافية، بمعاناة سمر، وما يحصل لها من والدها الذي لا يرى فيها خيرًا منذ ولادتها، لطالما يردد على مسامعها بأنها شر.
في صباح اليوم التالي…
اجتمعت العائلة على مائدة الطعام، وتحدثت إحدى الفتيات بنبرة بها شيء من الخجل، وبجوارها زوجها الذي يمسك بيدها لتشجيعها:
_ بعد كام شهر هانستقبل أول حفيد لعيلة عبد القوي حفيظ باشا، إن شاء الله.
ابتسم الجميع مباركين، والسعادة دقت على قلوب الجميع، عدا شخص كان يغلي من داخله، يقبض على يده أسفل المائدة، فجأة نهضت من موضعها بعد أن رسمت بسمة زائفة على محياها مردفة بضع كلمات مزيفة.
نظرت لها حماتها التي تجلس بقربها من الجانب الآخر تقول:
_ بجد يا تسنيم؟
ابتسمت لها تسنيم بهدوء توأ بعينيها:
_ أيوه يا ست الكل.
وبالطابق العلوي كانت تجوب غرفتها ذهابًا وإيابًا وهي تكاد تموت من الغيظ، الذي يملأ صدرها، نظرت صوب جهة معينة من الغرفة وتحدثت بغضب شديد:
_ تعالوا.
وبعد كلمتها برز أمامها ظلال سوداء ينظرون لها بترقب، لتقول حانقة:
_ تسنيم.
رأينا شبح ابتسامات على أفواههم السوداء وبعدها اختفوا من أمامها.
مساءً.
استلقت على فراشها تنظر إلى سقف الغرفة تضع يدها على معدتها المسطحة وعلى محياها ابتسامة هادئة، انطفأت الغرفة فجأة لتسقط ابتسامتها أرضًا، ومعها قلبها فأكثر ما تكرهه هو الظلام، بدأت تبكي بصوت مرتفع وشعرت بالشلل يصيب سائر جسدها، لم تقدر على التحرك وتلك عادة تلازمها حينما تخاف من شيء ما، بدأت تنادي على زوجها بعيون خائفة:
_ عمار… عمار… الحقني… حد يشغل النور.
اتسعت عينيها بقوة وهي تشعر بحركات مضطربة بداخل غرفتها، أصاب الجمود لسانها وقبل أن تفكر المسكينة بفتح فمها مرة أخرى، شعرت بجلوس أحدهم فوقها ليزداد هلعها ومعه ضربات قلبها الذي تعالت أصواته بقوة، نبست بضعف وبصوت بالكاد خرج من حلقها:


